Vettvangur fyrir samstarf lýðræðisríkja
Atlantshafsbandalagið (NATO) er bandalag tuttugu og átta ríkja frá Evrópu og Norður Ameríku, sem vinna saman að markmiðum stofnsáttmála NATO frá 4. apríl 1949. Ísland var eitt af tólf stofnríkjum Atlantshafsbandalagsins og er fullgildur aðili þess.
Aðalhlutverk NATO er að vernda frelsi og öryggi bandalagsríkjanna með pólitískum og hernaðarlegum aðferðum. Markmið bandalagsins er að vernda sameiginleg gildi lýðræðis, einstaklingsfrelsis, réttarríkis og friðsamlegra úrlausna deilumála. NATO er skuldbundið til að vernda aðildarríki sín gegn ógnunum eða hótunum en líkt og fram kemur í 5. gr. stofnsáttmálans jafngildir árás á eitt bandalagsríki árás á þau öll.
Sameiginlegar ákvarðanir
NATO er lýðræðisleg alþjóðastofnun þar sem Bandaríkin, Kanada og Evrópuríki ráða ráðum sínum um sameiginleg öryggismál og leita leiða til að takast á við þau sameiginlega. Allar ákvarðanir á vettvangi bandalagsins eru teknar á grundvelli einróma samþykkis aðildarríkja.
Varnarmálastofnun annast ýmis verkefni sem tengjast aðild Íslands að Atlantshafsbandalaginu (NATO). Þar ber tvennt hæst: Rekstur íslenska loftvarnakerfisins sem er jafnframt hluti af samhæfðu loftvarnakerfi Atlantshafsbandalagsins og gistiríkjastuðninginn, sem felst í rekstri mannvirkja og stuðningi við herlið bandalagsþjóðanna. Af öðrum verkefnum má nefna að Varnarmálastofnun tekur þátt í starfi ýmissa nefnda undirstofnana Atlantshafsbandalagsins, fyrir Íslands hönd.
---
Sjá: Heimasíða NATO